ጉዱን ሰሙ … ክቡራን ሚኒስትሮች መስሪያ ቤታቸው ያልተጠቀመበትን በጀት ለመዝረፍ ሰኔ ላይ ያሰፈስፋሉ::

[የክቡር ሚኒስትሩ አማካሪ ቢሯቸውን በርግዶ ገባ]

• ጉዱን ሰሙ ክቡር ሚኒስትር?
• የምን ጉድ ነው?
• መቼም እንደዚህ ዓይነት ጉድ ሰምቼ አላውቅም፡፡
• እኛማ በጣም ብዙ ጉድ የሚያስብል ሥራ እንሠራለን፡፡
• እንዴት ክቡር ሚኒስትር?
• ይኸው የከተማ ባቡር ሥራ ከጀመረ ቆሞ ያውቃል?
• ኧረ አያውቅም፡፡
• ከዚህ ባለፈ ወደ ጂቡቲ የሚሄደው ባቡር በቅርቡ ሥራ ይጀምራል፡፡
• እኔ የማወራው አልገባዎትም፡፡
• እንዴ ግድቡስ ቢሆን 70 በመቶ ደርሷል አይደል?
• ኧረ ክቡር ሚኒስትር እኔ የማወራው ሌላ ጉድ ነው፡፡
• ታክሲዎቹ ዳግመኛ አድማ መቱ እንዴ?
• ክቡር ሚኒስትር ችግርዎ ምን እንደሆነ ያውቃሉ?
• እኔ ችግር አለብኝ?
• ለዚያውም ከፍተኛ ችግር ነዋ፡፡
• ምንድን ነው ችግሬ?
• አለማዳመጥ፡፡
• ማንን ነው የማላዳምጠው?
• ማንንም፡፡
• እሺ ልስማህ እስቲ ምንድን ነው ጉዱ?
• ተሰረቀ እኮ፡፡
• ምኑ ግድቡ ነው?
• ግድቡማ እንዴት ይሰረቃል?
• ያው ሰሞኑን ኮንዶሚኒየም ቤቶች ተሰረቁ ሲባል ስለሰማሁ ሌቦቹ በነካ እጃቸው ግድቡንም ከሞጨለፉት ብዬ ነው፡፡
• ለነገሩ ሥጋትዎ ይገባኛል፡፡
• እና ምንድን ነው የተሰረቀው?
• ፈተናው ነዋ፡፡
• የምን ፈተና?
• የ12ኛ ክፍል ብሔራዊ ፈተና፡፡
• ኤጭ፡፡
• ያሳዝናል አይደል ክቡር ሚኒስትር?
• ምን ዓይነት ቀሽም ሌባ ነው?
• እንዴት ማለት?
• ሰው ካልጠፋ ነገር ወረቀት ይሰርቃል?
• አልገባኝም ክቡር ሚኒስትር?
• ተልካሻ ሌባ ነው፡፡
• ምን እያሉ ነው ክቡር ሚኒስትር?
• እኔ እኮ የማይገባኝ ይኼን ፕሮፌሽን እንደዚህ ዓይነት ሌቦች ናቸው የሚያሰድቡት፡፡
• እ…
• እኛ ይኼ ፕሮፌሽን የላቀ ደረጃ እንዲደርስ ሌት ተቀን እየሠራን፣ በጐን ግን እንደዚህ ዓይነት ሌቦች ወደ ታች ይጐትቱናል፡፡
• ምን እያሉ ነው ክቡር ራማኒስትር?
• ስንት የሚሰረቅ ነገር እያለ ሰው እንዴት ፈተና ይሰርቃል?
• ምን የሚሰረቅ ነገር አለ?
• ለምሳሌ መሬት፡፡
• ሌላስ?
• ሕንፃ፡፡
• ሌላስ?
• ቪላ፡፡
• ሌላስ?
• ፋብሪካ፡፡
• እ…
• ቅርጫ፡፡
• ምርጫ ነው ያሉኝ?

[ክቡር ሚኒስትሩ የፋይናንስ ኃላፊውን አስጠሩት]

• ለምን እንደጠራሁህ ታውቃለህ?
• አላወቅኩም ክቡር ሚኒስትር፡፡
• የበጀት መዝጊያ እየተቃረበ ነው አይደል?
• አዎን ክቡር ሚኒስትር፡፡
• ከበጀታችን ምን ያህሉን ተጠቅመናል?
• 30 በመቶውን፡፡
• እንዴ 30 በመቶውን ብቻ?
• አዎን ክቡር ሚኒስትር፡፡
• እንዴት ሆኖ?
• መጀመሪያም እኮ ለጥጠን ነው ያቀድነው፡፡
• እና መለጠጥ የለበትም ነው የምትለው?
• እህሳ ክቡር ሚኒስትር፡፡
• ለመሆኑ ምንድን ነው ያጠናኸው?
• 12ኛ ክፍል ነው የጨረስኩት፡፡
• እንዴት ነው ታዲያ የፋይናንስ ኃላፊ የሆንከው?
• በጣም አነባለሁ፡፡
• ምንድን ነው የምታነበው?
• አዲስ ራዕይ አንድም አምልጦኝ አያውቅም፡፡
• በጣም ጥሩ፡፡
• በዛ ላይ የጠራ የልማታዊ አስተሳሰብ ነው ያለኝ፡፡
• ሌላስ?
• ለፓርቲው ታማኝ ነኝ፡፡
• ቀጥል፡፡
• ቦታው ላይም የተመደብኩት በብሔር ተዋፅኦ ነው፡፡
• እንዲህማ ከሆነ ለቦታው ከበቂ በላይ ነህ፡፡
• ልክ ነዎት ክቡር ሚኒስትር፡፡
• ስለዚህ በጀታችንን በሚገባ መጠቀም አለብን፡፡
• ምን ይደረግ?
• ፕሮጀክት ይቀረፅ፡፡
• ምን ዓይነት ፕሮጀክት?
• እሱን ለእኔ ተወው፡፡

[ክቡር ሚኒስትሩ ሚስታቸው ጋ ደወሉ]

• መገናኘት አለብን፡፡
• ምን ተገኘ?
• ተገናኝተን መቅረፅ አለብን፡፡
• ቪዲዮ ነው?
• ሴትዮ ምን ሆነሻል?
• ቅርፃ ቅርፅ ነው?
• ጤነኛ ነሽ ግን?
• ታዲያ ምንድን ነው የምንቀርፀው?
• ፕሮጀክት፡፡
• የምን ፕሮጀክት?
• መሥሪያ ቤታችን 30 በመቶ በጀቱን ብቻ ነው የተጠቀመው፡፡
• 70 በመቶውስ?
• እሱን ወደ እኛ ማስገባት አለብን፡፡
• እንዴት አድርገን?
• መጀመሪያ የሕንፃችን ቀለም መቀየር አለብን፡፡
• ምን ዓይነት ልታደርጉት?
• ልማቱን የሚያመላክት ቀለም መሆን አለበት፡፡
• እኮ ምን ዓይነት?
• አረንጓዴ ነዋ፡፡
• ውይ አረንጓዴ ቀለም ግን የለንም፡፡
• ስቶክ ውስጥ ያለን ምን ዓይነት ቀለም ነው?
• ጉበት ከለር፡፡
• በቃ እሱ ይቀባላ፡፡
• ልማታዊ ቀለም ግን አይደለም እኮ፡፡
• እሱን ችግር በሌላ ነገር እንፈታዋለን፡፡
• በምን እንፈታዋለን?
• ልማታዊ ቀቢ እንዲቀባው እናደርጋለን፡፡
• ልማታዊ ሐሳብ ነው፡፡
• ሌላ ደግሞ የመሥሪያ ቤታችን ሙሉ ምንጣፍ መቀየር አለበት፡፡
• እንዴ ከኢራን የመጡ ምንጣፎች አሉን አይደል?
• ከግድግዳው ከለር ጋር የሚሄድ ምንጣፍ አዘጋጂ፡፡
• ምንጣፍ ግን ያለን አረንጓዴ ከለር ብቻ ነው፡፡
• ተፈላጊው ከለር እሱ አይደል እንዴ?
• እንዴት?
• ይኸው በዝናብ ምክንያት አረንጓዴ ነገር ስለጠፋ ቢያንስ ቢሯችን አረንጓዴ ምንጣፍ መኖሩ ግዴታ ነው፡፡
• ለነገሩ ልማቱን በደንብ ያመላክታል፡፡
• ሌላው መጋረጃዎች በአጠቃላይ ይቀየራሉ፡፡
• መጋረጃ ግን ያለን ቀለም ውኃ ሰማያዊ ብቻ ነው፡፡
• ይህቺን ሰማያዊ ከለር ግን አልወዳትም፡፡
• ምን ይሻላል ታዲያ?
• ይሁና ዓይኔ እያየ መቼም በጀቱ አይመለስም?
• እኔማ ደስ ይለኛል፡፡
• ሌላው በየቢሮው ሥዕል መሰቀል አለበት፡፡
• እኛ እኮ ሥዕል አንሸጥም፡፡
• ታዲያ ምን ችግር አለው? ገዝተን አትርፈን መሸጥ ነዋ?
• ይኼ ልማታዊ ሐሳብ ነው፡፡
• ሥዕሎቹ ግን እንትኑን ማንፀባረቅ አለባቸው፡፡
• ምኑን?
• ልማቱን!

[ክቡር ሚኒስትሩ የፋይናንስ ኃላፊውን አስጠሩት]

• አቤት ክቡር ሚኒስትር፡፡
• በጀቱን ለመጠቀም የሚከተሉት ነገሮች ይለወጡ፡፡
• ምኖቹ ክቡር ሚኒስትር?
• የሕንፃችንና የቢሯችን ቀለም፡፡
• እሺ፡፡
• መጋረጃና ምንጣፍ፡፡
• ሌላስ?
• የግድግዳ ሥዕሎች፡፡
• ምንም ችግር የለውም፡፡
• ስለዚህ እነዚህ ሲገዙ ዕቃዎች የበጀታችንን ምን ያህል ተጠቀምን ማለት ነው?
• 32 በመቶ ይደርሳል፡፡
• እና ቀሪውን ልንመልስ?
• ታዲያ ምን ይደረጋል?
• የማደርገውንማ እኔ አውቃለሁ፡፡
• ምን ሊያደርጉ?
• አንመልስም እላለሁ፡፡
• ለምን ቢባሉ ምን ይመልሳሉ?
• አንዴ ሰጥታችሁናል ሰጥታችሁናል!

[ክቡር ሚኒስትሩ ቤት ምሳ በልተው ከሾፌራቸው ጋ እየተመለሱ ነው]

• ዊኬንድ ኳስ አየህ እንዴ?
• አላየሁም ክቡር ሚኒስትር፡፡
• ለምን አላየህም?
• በኢቢሲ አይተላለፍም ነበር እኮ፡፡
• ኢቢሲ ታያለህ እንዴ?
• እኔ ታዲያ እንደ እርስዎ ዲኤስቲቪ የለኝ፡፡
• ለምን አታስገባም?
• ክቡር ሚኒስትር ደመወዜ ለአቅመ ዲኤስቲቪ አትደርስማ፡፡
• እንደ አንተ ዓይነቱ እኮ ናቸው የሚያሰድቡን፡፡
• እንዴት ማለት?
• ኢኮኖሚያችን በ11 ፐርሰንት እየተምዘገዘገ ባለበት ወቅት ደመወዜ ለአቅመ ዲኤስቲቪ አትደርስም ስትል ያሳዝናል፡፡
• የደላው ሙቅ ያኝካል አሉ፡፡
• እና አንተ ምንድን ነው የምታኝከው?
• ብሶት!

[ክቡር ሚኒስትሩ ቢሮ ገብተው ቲቪ እያዩ ነው፡፡ ጸሐፊያቸው ገባች]

• ክቡር ሚኒስትር…
• ፀጥ በይ!
• ምነው?
• ወሳኝ ሰዓት ላይ ነው የመጣሽው፡፡
• ምን እያደረጉ ነው?
• ቲቪ እያየሁ ነዋ፡፡
• ውይ እኔም ትላንት ለቅሶ ሄጄ አምልጦኝ ነበር፡፡
• ወንበር ስበሽ ቁጭ በይ በቃ፡፡
• ውይ ባለጉዳዮቹ ግን…
• እንዳታስመልጪኝ ዝም በይ አልኩሽ እኮ፡፡
• ቢሮ ባለጉዳዮች አሉ ብዬ ነው፡፡
• በዚህ ሰዓት እኛ ሁለት ባለጉዳዮች ብቻ ነው ያሉን፡፡
• እነማን ናቸው?
• ዛራና ቻንድራ!