ከዚህ በላይ ቁስል ከዚህ በላይ እንባ ( ሄኖክ የሺጥላ )

በላ

ደረትህን ድቃ
ዐይንህ ዶቃ እምባ ዛጎል ልቅሶ ያንባ
ዱብ ይበል ስቃይህ የጨው ውሃ ለብሶ
የፊትህን ሰማይ ፥ ገፅታህን ገምሶ!

በላ እናልቅሳ ፥ እሪ ኡኡ እንበል
ደም ሲፈስ እያየን ፥ ሲፈልቅ እንደ ጠበል !

ባንድ ጥያት እናት ፥ ባንድ ጥይት ኣራስ
ባንድ ጥይት ሲሞት ፥ ሲጣመር ሁለት ነብስ

ባገራችን ባህል
በደም ባጥንታችን
ኡኡ እንበል በቃ
ሲፈርስ ቤታችን !

እንደ ኣንበጣ ሲሞት ፥ ጎርፍ እንደጣለው ትል
ከእንባ ጅረት ሌላ ፥ በምን ቃል ምን ልትል ?

ከናቱ ትከሻ ፥ ጀርባ ላይ ተጣብቆ
በጥይት ሲነጠቅ ፥ በእንቅልፍ ኣለም ወድቆ
ምን ቃል ኣለህና
በምን ልትናገር
ዝም ብለህ ኡኡ በል ፥
ኡኡ በል ኣንት ሃገር !

እንባህን እርጭ እና ፥ ወደ ጥልቁ ሰማይ
ምልክት ተቀበል ፥ ከሁሉም የበላይ!

ኡኡ በል እሪ በል
ስፈር ሃዘንህን
እንደ እዮብ ጠጉር ንጭ
በል ጉዳው ገላህን !

«ንገረኝ እንግዲህ ኣንተም ተናገረኝ
ምድርን ስመሰርት ነበርክ መስለኝ»
ብሎ እስኪቆጣህ ኣምላክ እስኪቀየም
እሪ በል ኡኡ በል ፥ መኖሩ ኣልታየም !

መፈጠርህን እርገም ሰው መሆንህን ጥላ
ለምን ብለህ ጠይቅ ፥ እውነት እንዳትፈራ!

ለምን እኔን በለው ፥ ለምን ካለም ሁሉ
ለምን ሆነ በለው ፥ ለምን ሆነ ቃሉ !

ባምሳሉ ፥ በገፁ የፈጠረው ሲሞት
ለምን ብለህ በለው ፥ ለምን በለው በእውነት !

ኣትፍራ ጠይቀው ፥ ለምን ሙሴ እንዳጣን
ምን ሲል በምን ምክንያት እንዲህ የሚቀጣን !

ኡኡ በል እሪ በል ኣምላክም ይታወክ
ባያድነን እንኳ መኖሩን እንወቅ!

ኣታልቅሱ ብሎ ፥ ሊቆጣን ሲመጣ
እንጠይቀዋለን ፥ መቼ እንደሚፈርድ ፥
ፀሃይ እንደሚወጣ !

ድረስ ብለን ያልነው
ለዘመን ኣርፍዶ
እራሴን ስጠላ ከተቆጣ ወርዶ
እኔ ምን ቸገረኝ ፥ እሱ ያናግረኝ እንጂ
እራሴን መጥላቴ ኣይከፋም ከመሞት ፥ ከመጥፋት በፈንጂ !

ስለዚህ እሪ በል
ኣምላክ የለም ወይ በል
ድንገት ኣለሁ ካለ ፥ ካፈለቀ ጠበል
ሙሴን ከፈጠረ ከከፈለ ባህር
ድንገት ተበሳጭቶ
ድንገት ተቆጥቶ
መኖሩን ካሳየ ፥ ባሳቤ ተከፍቶ
የለም ብለህ ኣስቆጣው
የለም ብለህ ጥራው

በነገሩን ባነበበነው በክታቡ እንዳየነው
ኣምላክም ቢሆኑ ራሱ ፍፁም ቀናተኛ ነው ።

ድረስ ብለን ካልሰማን ፥ ካልደረሰ እንደ ዛሬ
የለህም ንብለህ ጥራው ፥ እሪ ብለህ በቀብሬ