በሙስና የሰከሩት የቀዥቃዣው ሚኒስትር ውሎ

[ክቡር ሚኒስትሩ ከቤት ሊወጡ ሲሉ ከሚስታቸው ጋር እያወሩ ነው]
– ወዴት ልትሄድ ነው?
– ወደ ሥራ ነዋ፡፡
– ሥራ ትሠራለህ እንዴ?
– ምን ዓይነት ጥያቄ ነው?
– ትክክለኛ ጥያቄ ነዋ፡፡
– ምን እያልሽ ነው?
– ስለተጠራጠርኩ ነው፡፡
– ምኑን ነው የምትጠራጠሪው?
– ሥራ መሥራትህን?
– ሴትዮ ምን እያልሽ ነው?
– ግራ ስለገባኝ ነዋ፡፡
– ምኑ ነው ግራ የገባሽ?
– ለመሆኑ በአገር አለህ?
– ደሞ የት እንድሄድልሽ ፈልገሽ ነው?
– ታዲያ ይህ ሁሉ ሲሠራ የት ነበርክ?
– መንግሥት ግልበጣ ተካሄደ እንዴ?
– መንግሥት ባይገለበጥም ሌላ ነገር ተገልብጧል፡፡
– የጭነት መኪኖቻችን ተገለበጡ እንዴ?
– ቢዝነሳችን እየተገለበጠ ነው፡፡
– የትኛው ቢዝነሳችን?
– ዋናው ቢዝነሳችን፡፡
– በምን ምክንያት?
– ቫይበር እኮ ቆሟል፡፡
– እስካሁን?
– አገር ውስጥ አለህ ወይ የምለው ለዚህ ነው?
– ፈተናው አላለቀም እንዴ?
– የትኛው ፈተና?
– ማትሪኩ ነዋ፡፡
– እሱማ አልቋል፡፡
– ታዲያ ለምን አልተለቀቀም?
– ምናልባት ሌላ ፈተና ይኖር ይሆናላ፡፡
– ምን ዓይነት ፈተና?
– የሚኒስትሮች ፈተና፡፡
– ምናለ ቀልዱን ብተይው?
– ወድጄ አይደለም የምቀልደው ባክህ?
– ምን እየሆኑ ነው ግን?
– እነማን?
– ቴሌዎች፡፡
– ከባለቤቱ ያወቀ ምንድን ነው አሉ?
– ምን ለማለት ፈልገሽ ነው?
– መንግሥት ነኝ ባዩ አንተ አይደለህም እንዴ?
– በጣም ተናንቀናል ማለት ነው?
– ከማን ጋር?
– ቫይቨርን ከዘጉት ሰዎች ጋር፡፡
– መናናቅ ብቻ?
– ጦማችንን ሊያሳድሩን ነው እንዴ?
– አየህ መንግሥት ከኋላ ቀርነት ስላልተላቀቀ በቫይቨር ምናምን ቢዝነስ የሚሠራ አይመስለውም፡፡
– የግንዛቤ ማስጨበጫ መሥራት አለብኝ፡፡
– ምን ዓይነት ግንዛቤ ማስጨበጫ?
– ቫይቨር ምን ያህል ጠቃሚ መሆኑን ነዋ፡፡
– ይገባቸዋል ብለህ ነው?
– እንዲገባቸው አደርጋለሁ፡፡
– ያለበለዚያ ችግር ውስጥ ነን፡፡
– የምን ችግር?
– ቢዝናችን ይመታል፡፡
– በምን?
– በኪሳራ፡፡
– መንግሥት እኮ አይታመንም፤ ሊያደርገው ይችላል፡፡
– ምን ሊያደርግ ይችላል?
– ሊያረሳሳን ይችላል!
[ክቡር ሚኒስትሩ በጣም ተናደው ቴሌ ደወሉ]
– ሄሎ!
– ማን ልበል?
– እኔ ጠፋሁ፡፡
– ኧረ አይጥፉ፡፡
– ምንድን ነው ያልከው?
– ማን ልበል?
– ዛሬም ማን ልበል ትላለህ?
– ይቅርታ ማን ልበል?
– ስልኬን ለምን አትመዘግበውም?
– ማን ልበል?
– በጣም ተናንቀናል፡፡
– ይቅርታ ልዘጋው ነው፡፡
– ክቡር ሚኒስትር ነኝ፡፡
– ይቅርታ ክቡር ሚኒስትር፡፡
– ሁልጊዜ ስደውል ለምንድን ነው ማን ልበል የምትለኝ?
– ከዚህ በፊት ደውለው ነበር?
– ባለፈው ደውዬልህ አልነበር እንዴ?
– ክቡር ሚኒስትር ብዙ ኦፕሬተር እኮ ነው ያለው!
– እና እኔ ራሴን ለሁላችሁም ማስተዋወቅ አለብኝ?
– ታዲያ ምን ይሻላል?
– ለምን ለራሴ የግሌ መስመር አትሰጡኝም?
– ልክ እንደ 994 ቁጥር ማለትዎ ነው?
– አዎና፤ 995ትን ለምን አትሰጡኝም?
– እየቀለዱ ነው ክቡር ሚኒስትር?
– ቀልድ መሆኑን አሳይሃለሁ፡፡
– ይቅርታ ክቡር ሚኒስትር፡፡
– ለመሆኑ ቫይበርን ለምን ዘጋችሁት?
– ውሳኔው የእናንተ አይደል እንዴ?
– እኔ ስወስን አይተሃል?
– ያው አለቆቻችን ናቸው እኮ የወሰኑት፡፡
– እኮ እኛ እንዴት ሥራ እንሥራ?
– እኔ’ጃ፡፡
– ለነገሩ የማደርገውን እኔ አውቃለሁ፡፡
– ምን ሊያደርጉ ነው?
– ድርጅታችሁን . . .
– ምን?
– አዘጋዋለሁ!
[ክቡር ሚኒስትሩን አንድ ባለሀብት ወዳጃቸው ምሳ ይጋብዛቸዋል]
– ዛሬ እንዴት ትዝ አልኩህ ባክህ?
– ክቡር ሚኒስትር እርስዎ እኮ ሁሌም ነው ትዝ የሚሉኝ፡፡
– ፎጋሪ ነገር ነህ፡፡
– ክቡር ሚኒስትር ተሳካልኝ እኮ?
– ምኑ?
– በእርስዎ በኩል የሄድኩበትን መሬት አገኘሁ፡፡
– እንኳን ደስ አለህ፡፡
– ለዛም ነው ዛሬ ምሳ ልጋብዝዎት የፈለኩት፡፡
– ኪራይ ሰበሳቢ ሆነሃል ልበል?
– እንዴት ክቡር ሚኒስትር?
– አዲስ አበባን የሚያክል መሬት አስጥቼህ በምሳ ልትገላገለኝ?
– ኧረ እንደዛ አይደለም ክቡር ሚኒስትር፡፡
– ለዛውም በሽሮ?
– አይደለም ክቡር ሚኒስትር፡፡
– ታዲያ እንዴት ነው?
– እዚሁ ቤት ያለውን ሰው ይመለከቱታል?
– ይኼ ሁሉ ሰው ምንድን ነው?
– እዛ ጋ ያለው በከተማችን ዋነኛ ብረት አስመጪ ነው፡፡
– እሺ፡፡
– ከጎናችን ካለው ጠረጴዛ ቀጥሎ ያለው ላይ የተቀመጠው ደግሞ የከተማችን ዋነኛ ዕቃ አስመጪ ነው፡፡
– እሺ፡፡
– ክቡር ሚኒስትር በቃ አሁን ሽሮ ቤት ፋሽን ሆኗል፡፡
– ኧረ ባክህ?
– በርካታ ቢዝነስ እንደዚህ ዓይነት ሽሮ ቤት ነው የሚሠራው፡፡
– እና ምን እያልከኝ ነው?
– እኔም ላደረጉልኝ ውለታ አሪፍ ሽሮ ቤት ልከፍትልዎት አስቤያለሁ፡፡
– እውነት?
– አዎ፣ ከዛ የከተማችን ወሳኝ ሰዎች በእጅዎ ያስገቧቸዋል፡፡
– በጣም ደስ የሚል ሐሳብ ነው፡፡
– ክቡር ሚኒስትር ገቢውም ቀላል አይደለም፡፡
– አሁን ከሽሮ ምን ይገኛል?
– እንዴ አንድ ሽሮ መቶ ብር ነው፡፡
– ለምን ሲባል?
– የክላስ ጉዳይ ነዋ፡፡
– የምን ክላስ ነው?
– አዎን፣ በቃ ልክ እንደ iphone የሽሮ ቤት ክላስ አለው፡፡
– እና የምትከፍትልኝ ሽሮ ቤት ምንድን ነው የሚባለው?
– iሽሮ ቤት!
[ክቡር ሚኒስትሩ ሌላ ሚኒስትር ስልክ ደወሉ]
– ሰላም ክቡር ሚኒስትር፡፡
– እንዴት ነህ ባክህ?
– እግዚአብሔር ይመስገን፡፡
– ለመሆኑ አንተ ደስተኛ ነህ?
– በምኑ ክቡር ሚኒስትር?
– በሥራህ?
– ሕዝብን እንደማገልገል የሚያስደስት ምን ነገር አለ?
– እኔ የምልህ በገቢህ ነው?
– ከእሱ በላይ ሕዝብ የሚያገኘው እርካታ ነው ለእኔ ገንዘቤ፡፡
– አየህ የአንተ ችግርህ ይኼ ነው፡፡
– እንዴት ክቡር ሚኒስትር?
– መውድቂያህን ማሰብ አለብህ፡፡
– ምን ማለት ነው?
– እዚህ ወንበር ላይ ለዘለዓለም የምትቀመጥ መሰለህ እንዴ?
– አልገባኝም?
– ስማ እኔ ከልጅነቴ ጀምሮ አወዳደቄን አሳምርልኝ እያልኩ እፀልያለሁ፡፡
– ፀሎትዎ ተመለሰልዎት ታዲያ?
– እህሳ፡፡
– በምን?
– ይኸው ሪል ስቴቱ ብትል፣ ፋብሪካው ብትል፣ ንግዱ ብትል ያልገባሁበት ዘርፍ ምን አለ?
– ምን?
– ከዚህ በላይ አወዳደቅህ እንዴት ሊያምር ይችላል?
– ክቡር ሚኒስትር እውነትም አብዝተውታል፡፡
– ስማ ሲሾም ያልበላ ሲሻር ይቆጨዋል ነው ተረቱ፡፡
– ምን እያሉኝ ነው?
– አንድ ቀለል ያለች ቢዝነስ አምጥቼልሃለሁ፡፡
– የምን ቢነዝነስ?
– የሽሮ ቤት ቢዝነስ፡፡
– እና ምን ላድርግ?
– ሥራውን አንድ ላይ እንጀምረው፡፡
– የሽሮውን?
– አዎን፡፡
– እና ምን እናድርግ?
– እንደራጅ፡፡
– በምን?
– በአነስተኛና ጥቃቅን!
[ክቡር ሚኒስትሩ ሽሮ ቤቷ ተከፈተችላቸው፡፡ የምረቃው ቀን ከአንድ ነጋዴ ጋር እያወሩ ነው]
– እንዴ ክቡር ሚኒስትር እዚህ ምን ያደርጋሉ?
– አንተ ራስህ ምን ታደርጋለህ?
– እኔማ ልመርቅ ነው የመጣሁት፡፡
– እኔ ደግሞ ላስመርቅ ነው የመጣሁት፡፡
– በነገራችን ላይ ከተማችን ላይ አሁን የሽሮ ቢዝነስ ደርቷል፡፡
– እኔም እሱን አውቄ አይደል እንዴ የገባሁበት?
– የእርስዎ ነው እንዴ ክቡር ሚኒስትር?
– እህሳ፡፡
– አይ ክቡር ሚኒስትር በቃ አሪፍ አሪፍ ነገር አያመልጥዎትም አይደል?
– አካሄዴ የተጠና ነው፡፡
– ቢዝነስ እኮ እዚሁ ነው የሚሠራው፡፡
– በሚገባ አውቃለሁ፡፡
– ክቡር ሚኒስትር ቲማቲሟን መብላት ግን ፈራሁ፡፡
– ለምን?
– ያው ከተማችን ውስጥ ወረርሽኝ ገብቷል አይደል?
– ችግር የለውም ይኼ ከውጭ ነው የመጣው፡፡
– ያዋጣዎታል?
– በደረጃ ከፋፍለነዋል፡፡
– እንዴት?
– ለደረጃ ‹ሀ› ግብር ከፋይ ከእስራኤል የመጣ ቲማቲም በኦሊቭ ኦይል ነው የሚሠራው፡፡
– እሺ፡፡
– ለደረጃ ‹ለ› ግብር ከፋይ ደግሞ በአገር ውስጥ ቲማቲም በሰን ፍላወር ኦይል ነው የሚሠራው፡፡
– ለደረጃ ‹ሐ› ግብር ከፋይስ?
– ለእነሱ ደግሞ ባደረ ቲማቲም በጭቃው ዘይት ነዋ፡፡
– በደንብ የክላስ ልዩነት የሚታይበት የሽሮ ቤት ነዋ፡፡
– ለዛ እኮ ነው ስሙን iሽሮ ያልኩት፡፡
– እኔ ግን ስሙ ቢቀየር ደስ ይለኛል፡፡
– ምን ይባል?
– ሚኒስትሩ ሽሮ!